Udayananu Tharam

 படத்தில் பட இடங்களில் "மலையாள சினிமாவை சீரழிப்பதே இவர்கள்தான்" என்று பொருள்படும் விதத்தில் வசனங்கள் வருவதை கேட்டிருக்கலாம்.
  வெறுமனே இப்படத்தை பார்த்தால் "எதுக்கு இந்த கொந்தளிப்பு?" என்று தோன்றும்.ஆனால் இந்தப்படம் வந்த பின்னணியை ஆராய்ந்து பார்த்தால் தான் அது புரியும்.

   ஆசான் எழுதிய இந்தப்பதிவு அதன் பின்னணியை தெளிவாக உணர்த்தும்.தொண்ணூறுகளில் மலையாள சினிமாவின் வீழ்ச்சி துவங்கியதாக குறிப்பிடுகிறார்!வளைகுடா பணத்தினால் நடுத்தர வர்க்கம் திரை அரங்கத்திற்கு வருவதை நிறுத்தி வீட்டிலேயே ஹோம் தியேட்டர் வைத்து படம் பார்க்க துவங்கியதால் ஏற்கெனவே சிறிதாக இருந்த மலையாள திரையிடல் பரப்பளவு மேலும் குறைந்துவிட மீதமிருக்கும் ரசிகர்களை திரையரங்கிற்கு இழுக்க மம்மூட்டி மோகன்லால் பிரித்விராஜ் போன்றோர் ஒரே நேரத்தில் ஏகப்பட்ட பேரை புரட்டி எடுக்கும் காட்சி,ஆகாயத்தில் மிதத்தல்,வெளிநாட்டில் டூயட் என்றெல்லாம் திசை மாறியதாக சொல்கிறார்.

 

          குறிப்பாக மலையாள பார்வையாளர்கள் ஆங்கிலப்படங்கள் மற்றும்  தமிழில் உருவாக்கப்படும் அதீத பட்ஜெட் படங்களில் உள்ள தொழில்நுட்ப உச்சங்களால் கவரப்பட்டதாகவும் சொல்கிறார்.இங்கு பப்படம் ஆன குருவி கூட அங்கே பெரிய hit ஆகி இருக்கிறது. மணிச்சித்திரதாழ் படத்தை விட நான்கு மடங்கு சந்திரமுகி வசூல் செய்துள்ளது!

      இத்தகைய பின்னணியிலேயே இந்த படத்தை பார்க்க வேண்டும்!ஒருவகையில் இப்படத்தில் நடித்த மோகன்லால் மீதான விமர்சனமாகவும் இப்படம் உள்ளது!காரணம் அவருமே இந்த சீரழிவில் ஒரு பங்கு வகித்தவர்.மம்மூட்டியும் அவரும் தவிர்க்க முடியாத காரணத்தால் அத்தகைய படங்களில் நடிக்க வேண்டிய சூழலை இப்படம் விமர்சிக்கிறது.
     

சரோஜ் குமார் நடிக்கும் வணிக படங்கள் பெருவெற்றி பெற்று அவர் திடீர் உச்சம் தொடுவது கூட அப்போதைய மலையாள சினிமா சூழல் மீதான; ரசிகர்களின் ரசனை மீதான நையாண்டி தான்!
    எழுத்தாளர்கள் வசம் இருந்த மலையாள சினிமா தொண்ணூறுகளில் விலகி இரண்டாயிரங்களில் முற்றிலும் வணிகமயமாக ஆகிறது. கலைப்படம் -இடைநிலை சினிமா- வணிக சினிமா பேதங்கள் போய் எல்லாமே அனல் பறக்கும் பின்னணியில் ஹீரோ எதிரிகளை பந்தாடும் கதையாக மாறுகிறது.

    ஆனால் 2010 களில் இந்த நிலை மாறிவிட்டது.இதை ஆசான் ஒப்புக்கொள்ள மறுத்தாலும் [ஆசானின் நேரடி/மறைமுக பங்களிப்புடன் வந்த சில தமிழ்ப்படங்களை விடவும் அவை மேலான தரத்தில் தான் உள்ளன.குறிப்பாக சமீப காலத்தில் அவர் புகழும் அந்த புரட்சி இயக்குனர் எடுத்த மோவாயிச (வார்த்தை உதவி - அதே ஆசான்தான்) படங்களை விட பல நூறு மடங்கு மேலான நிலையில் தான் தற்கால மலையாள சினிமா உள்ளது]அதான் நிஜம்.அவர் தற்கால மலையாள சினிமாவை ஏற்க மறுக்கிறார்.அது அவரது எண்ணம்.ஆனால் 2000களில் இருந்த மோசமான நிலை இப்போது இல்லை.அல்போன்ஸ் புத்திரன் வினீத் ஶ்ரீநிவாசன் போன்றோர் 2010களில் புது ரத்தம் பாய்ச்சியதன் பலனாக இப்போது தரமான பல படங்கள் மலையாளத்தில் தொடர்ந்து வந்து கொண்டிருக்கிறது.

 

       இது ஒருபுறமிருக்க இந்தப்படத்தை தமிழில் ரீமேக் செய்த அவலத்தை பற்றியும் சொல்லியாக வேண்டும்.தனஞ்செயன் ,ஶ்ரீநிவாசன் கேரக்டரில் விவேக்/வடிவேலு போடலாம் என்று சொன்னதை கேட்காமல் பிரகாஷ் ராஜே நடித்ததால் படம் பப்படம் ஆனது என்கிறார்.

 

அப்படி வேறு எவரை போட்டிருந்தாலும் படம் பப்படமாக தான் ஆகியிருக்கும்!

 இரண்டு காரணங்கள்.

- படத்தை இயக்கிய விஜி ஏற்கெனவே ராதாமோகன் படத்துக்கு வசனங்கள் எழுதியவர் என்ற காரணமோ என்னமோ இந்தப்படமும் 'ராதாமோகன்தனமாக'த்தான் இருந்தது.

வடிவேலு அசாத்திய திறன் கொண்ட நடிகர் தான்.அவருக்கான தனித்தன்மைகள் உண்டு.அவரைப்போல் மற்றொருவரை சுட்டிக்காட்ட முடியாதுதான்!ஆனால் இந்த கேரக்டருக்கு ஶ்ரீநிவாசன் போல ஒருவரை தமிழ் சினிமாவில் நம்மால் சுட்டிக்காட்ட முடியவில்லை!அவர்  தனித்தன்மை கொண்ட  ஒரு பன்முகக்கலைஞன்!

 

   மேலும் தமிழ் சினிமாவில் அப்போது(வெள்ளித்திரை வந்த 2008 களில்)  தலைபோகும் பிரச்சனை எதுவும் இல்லை. இப்போது அப்படத்துக்கான தேவை இருப்பதாக நாம் நினைக்கிறோம்.ஆனாலும் ஶ்ரீநிவாசன் செய்த கேரக்டரை செய்ய இப்போதும் ஆளில்லை!

RDX - Cascading effect!

 தள்ளுமாலா படம் பார்த்தபோதே இப்படத்தையும் பார்க்க வேண்டும் என்று நினைத்தோம்.பல பதிவுகளில் இப்படமும் அதுபோலவே சண்டைக்காட்சிகள் நிறைந்த படம் என்று குறிப்பிட்டிருந்தார்கள்.

    தள்ளுமாலா அளவுக்கு அடிதடி இல்லை என்றாலும் நறுக்கென்று இரண்டு சண்டை மனதை கவர்ந்துவிட்டன!வெறும் சண்டைதான் படமா என்றால் இல்லை.சண்டையின் பின்விளைவுகள் என்று சொல்லலாம்.

 

      அது ஒரு புறமிருக்க வேறொரு விஷயத்தை குறிப்பிட வேண்டும்.படத்தில் தற்காலமாக காட்டப்படும் ஆரம்ப மருத்துவமனை காட்சியில் ஒருவர் நோக்கியா N95 மூலம் பேசுவதை கண்டோம்.அப்போ 2005 /06 ஆக இருக்கும் என்று புரிந்தது.
    பிறகு டிவியில் ஜெயசூர்யா விளையாடிக்கொண்டிருப்பதை காட்டியதும் "சரி..அப்போ கண்டிப்பா 96 க்குதான் போகப்போகிறார்கள்" என்று நினைத்தால் கதை 97 க்கு செல்கிறது.23.10.97 என்று மகிமா படிக்கும் காலேஜ் போர்டில் எழுதப்பட்டதை கண்டதும் cascading effect!!!!
    பரணில் அடுக்கப்பட்டிருக்கும் சாமான்களை மொத்தமாக கீழே தள்ளிவிட்டது போல இருந்தது.நினைவுப்பரணில் அடுக்கப்பட்ட பல்வேறு விஷயங்கள் "இதெல்லாம் நினைவில் இருக்கா?" என்று நம்மையே ஆச்சரியப்பட வைத்தது விஷயங்களை கண்டுகொண்டோம்!
    97 தீபாவளிக்கு தமிழில் பனிரெண்டு படங்கள் வந்தன!இப்போதும் ரசிக்கும் படம் தேடினேன் வந்தது! :D இப்போது போல ஒரே படத்தை ஆறாயிரம் திரைகளில் நிரப்பும் வேலைகள் அப்போதில்லை!இரண்டு அல்லது அதற்கு மேற்பட்ட தியேட்டர்கள் உள்ள காம்ப்ளெக்ஸ் சென்றால் ஒன்று இரண்டு என்று நாமே வரிசைப்படுத்தி ஒவ்வொரு படமாக பார்த்ததுண்டு.
     12- படங்களில் odd man out என்றால் வாசுகி தான்.விசு ஊர்வசி ஆகியோர் நடித்த அந்தப்படம் தமிழ்ப்படமா?தெலுங்கு படமா என்று இன்றுவரை நமக்கு புரியவில்லை.இப்படி குழப்பியடித்த மற்றொரு படம் அர்ஜுனின் நூறாவது படமான மன்னவரு சின்னவரு!
 

   ரட்சகன் கம்பெனி கேசட் வழக்கமாக கிடைக்கும் பதினொரு மணிக்கு வராமல் கொட்டும் மழை வேறு!ஒருவழியாக மாலை ஆறு மணிக்கு வந்தது!

 

      படத்தில் எல்லாரும்(அதாவது 97 இல்) பூப்போட்ட சட்டைகள் அணிகிறார்கள்.அதை பார்த்ததும் அண்ணா நியாபகம் :D

    காதலுக்கு மரியாதை படத்தில் அண்ணா முழுக்க கோடுபோட்ட சட்டை /கட்டம் போட்ட சட்டை/பிளைன் சட்டைதான் அணிந்து வருவார்.அந்தப்படம் மொத்தமாக எல்லாரையும்(அண்ணா ரசிகர்கள் மட்டுமல்லாமல்) பிளைன் சட்டை/ கோடு/கட்டம் போட்ட சட்டைக்கு மாற்றியது!பிறகு ஏப்ரல் 98 ஜீன்ஸ் வெளியான பிறகு 'ஜீன்ஸ் சட்டை' என்றோன்று விற்பனைக்கு வந்தது!அடர் சிகப்பு நிறத்தில் அதுவும் கட்டம் போட்ட சட்டைதான் (அதுக்கு விதை நாம்போட்டது - அண்ணா).

 

            19.12.97 முதல் என்று காதலுக்கு மரியாதை போஸ்டரை(நிஜத்தில்) கண்டபோது ஷாலினி இடதுகையில் கிடாரை பிடித்து வாசிப்பது போல புகைப்படம் இருந்தது.ஆனால் படத்தில் வலதுகையில் வாசிப்பார்!போஸ்டரை  திருப்பி அடித்துவிட்டார்கள்!
  அக்டோபர் 97 இல் வந்த மற்றொரு படமான சாம்ராட் பற்றி ஏற்கெனவே நாம் பதிவிட்டுள்ளோம்.இப்போதுள்ள திடீர் ராம்கி கிரேஸில் அப்படம் பற்றி குறிப்பிடுவது நமது கடமையல்லவா? :D

      

இப்படத்திலும் தேவராகம் படத்தின் பாடலுக்கு மஹிமா நடனமாடுகிறார்.ஏற்கெனவே ப்ரேமலு படத்தில் மமிதா பைஜு அப்படத்தின் வேறொரு பாடலுக்கு நடனம் ஆடியிருந்தார்!

 

   தேவராகம்  கேரளத்தில் இவ்வளவு பிரபலமான படமன்று நமக்கு இப்போதுதான் தெரியும்!"ஶ்ரீதேவி அரவிந்த் சாமிக்கு அக்கா போல தோற்றமளிக்கிறார்" என்ற ஒற்றை வரியில் தமிழகத்தில் படத்தை காலி செய்து விட்டார்கள்!
       

   அப்புறம் கரணிசம்! 90ஸ் என்றாலே அண்ணாயிசம் & கரணிசம் இல்லாமலா?98 இல் வந்த சொல்லாமலே படத்தில் கரண் மைக்கேல் ஜாக்சன் போல ஹேர்ஸ்டைல் வைத்துக்கொண்டு வருவார்(கொஞ்சம் பின்னாடி ஃபங்க் மிஸ் ஆகி இருந்தாலும்)!பிறகு தமிழ் சினிமா வழக்கம்போல அமெரிக்க மாப்பிள்ளை பல்பு வாங்கும் கதை தெரிந்ததே!அதே போல ஹேர்ஸ்டைல் இப்படத்தில் சேவியர்(நீரஜ் மாதவ்) வைத்திருந்தார்.
*
    பைக் புராணம்:
அந்த காலனி சண்டைக்காட்சி அட்டகாசமாக இருந்தது ஒருபுறம் என்றால் அங்கே நிறுத்தப்பட்டிருந்த பைக்குகளில் நம் கவனத்தை ஈர்த்தது சுசூகி ஃபியரோ மற்றும் சேவியர் தற்கால கதையில் பயன்படுத்திய  2001 மாடல் பல்சர்.பல்சர் அதன்பிறகு ஏகப்பட்ட டிசைன் மாற்றங்களை கண்டுவிட்டாலும் 2001 மாடல் மாதிரி வரவில்லை!எதிரி படத்தில் மாதவனும் விவேக்கும் மதன் பாபை ஏமாற்றி 2001 மாடல் பல்சரை தள்ளிக்கொண்டு வந்துவிடுவார்கள்!
பஜாஜ் டிஸ்கவரில் வில்லன் கோஷ்டியில் ஒருத்தர் வருகிறார்.அப்போதைய மிடில் கிளாஸ் நாயகனான டிவிஎஸ் விக்டர்  மிஸ்ஸிங்!

    படத்தில் சேவியர் பயன்படுத்தும் யமஹா RXZ மாடல் புதுமை!இதில் வில்லன் கோஷ்டி வசம் RX100 ஐ கொடுத்துவிட்டார்கள்!ரட்சகன் படத்தில் ஆவேசமான நாகார்ஜூனா RX100 இல் வருவார். காதலுக்கு மரியாதையில் சாந்தமான அண்ணா  splendor இல் வருவார்.தாமு சுசூகி சாமுராயில் வருவார். சாமுராய் வாங்கி போட்டுட்டா போதும்!சர்வீசே பண்ணாட்டாலும் எந்த பிரச்சனையும் பண்ணாமல் ஸ்மூத்தாக ஓடும் என்று பெயர் வாங்கியது சாமுராய்!

*

   படத்தில் சண்டைக்காட்சிகளில் சிரமப்பட்டவர் ஆன்டனி வர்கீஸ் தான்.அவரது உடல்வாகு பல இடங்களில் ஒத்துழைக்க மறுப்பது தெரிந்தது.அவரைவிடவும் பாபு ஆன்டனி கடைசியில் ஃபிட்டாக சண்டை போடுகிறார்!ஷேன் நிகம் இவ்வளவு நல்ல டான்சர் என்பது பாடலில் தெரிந்தது.அவரும் நீரஜும் சண்டைக்காட்சிகளை நன்றாக செய்துள்ளனர்.

 

        அன்பறிவ் படத்தின் ஸ்டண்ட் மாஸ்டர்கள்.லியோ படத்தில் அவர்கள் ஓவராக ரோப் ஷாட் கிரீன் மேட்டை பயன்படுத்தியது பற்றி நமக்கு கடுப்பு இருந்தது.இப்படத்தில் ரோப் ஷாட் மிக மிக குறைவு.மிக அற்புதமாக ஸ்டண்ட் அமைத்துள்ளனர்.

 

சமீப காலங்களில் வந்த எந்த மலையாள படத்தை பார்த்தாலும் ஒரு பாடலாவது மனதில் பதிந்து விடுகிறது.நீல நிலவே பாடல் அப்படியானது!

     மஹிமா நம்பியாருக்கு தமிழ் சினிமா பாணியில் அரை இன்ச் குரூட்ஆயிலை முகத்தில் பூசி வைத்துள்ளார்கள்.

 

மேக்கப் மேன்/வுமென் பாலா/வெற்றிமாறன் படத்தில் பணிபுரிந்தவரோ?? மஹிமா என்றாலே நினைவுக்கு வருவது மகாமுனி படத்தில் அவர் செய்த கேரக்டர்.லூசான பேண்ட்டை அவ்வப்போது மேலே இழுத்துவிட்டுக்கொண்டு விநோதமான உடல் மொழியில்- ஆர்யாவிடம் கேட்டாரோ?அல்லது வேறு யாரிடமோ?நினைவிலில்லை(புக்கை உதயாவிடம் கேட்டிருக்கணும் - சூர்யா)"-முனியாண்டி எழுதிய கலகம் காதல் இசை புக் இருக்கா?" என்று நாமே எதிர்பாராத விதமாக படத்தில் கேட்டது மறக்க முடியாது.,(அதானே! முனியாண்டி எழுதிய துண்டுசீட்டு வரை அப்போது விடாமல் படித்த உதயாவுக்கு இக்காட்சி vibe ஆகாமல் இருந்திருக்குமா? - கும்மாங்கோ).

   
     
      
      
    

Trance,Title Track & விநாயகன்

 Trance படம்(படத்தை மூன்றாவது முறையாக பார்த்தோம்) மத மோசடிகளை மட்டுமே பேசுகிறது என்று நினைப்பவர்கள் அப்படத்திற்கு துரோகம் இழைக்கிறார்கள்.முதல்முறை பார்த்தபோது நமக்கே அப்படித்தான் தோன்றியது!சரி, அதுவும் உண்டு என்றாலும் அதைத்தாண்டி அடிநாதமாக மையப்புள்ளியாக இருப்பது விஜு பிரசாத்(ஃபஹத்)தின் மனப்பிறழ்வுகள்.சாதாரணமாக ஒவ்வொரு முறையும் அதீத mood swing கில் கீழே போனால் மீண்டும் மேலே வரலாம்.ஆனால் பழைய கோட்டுக்கு பல படிகள்  கீழேதான் புதிய கோடு இருக்கும்!ஸ்விங் என்று அழைக்கப்பட்டாலும் ஊஞ்சல் போல ஆரம்பப்புள்ளிக்கு என்றுமே செல்ல முடியாது!

 

    தனது மரபணுவில் கல்வெட்டாக பதிவாகிவிட்ட தற்கொலை விழைவை ஒவ்வொரு முறையும் எதிர்கொண்டு அதைத்தாண்டி வருதல்,தனது தம்பியின் நியாபகம்,தாய் மற்றும் தம்பி போல தானும் ஆகிவிடக்கூடாது எனும் உறுதி-அந்த உறுதியும் பலநேரம் ஆட்டம் கண்டுவிட மீண்டும் தன்னைத்தானே கைபிடித்து தூக்கி நிறுத்தும் முயற்சிகள்,சில மருந்துகளால் கடந்தகால ஆறாத்தழும்புகளை மனதின் பார்வையில் இருந்து திரை போட்டு தற்காலிகமாக மறைக்க முடிந்தாலும் அது உள்ளே ஏற்கெனவே உண்டாக்கிய கடும் அதிர்வுகள் ஏற்படுத்தும் விளைவுகள் என்று நுட்பமான பல உளவியல் போராட்டங்களை படம் சொல்கிறது.

 

      குறிப்பாக பல வருடங்கள் கழித்து விஜூ மீண்டும் தனது வீட்டுக்கு செல்லும் காட்சி.தெரபி என்பதில் கடந்தகால அவலங்களை மீண்டும் அணுகி ஆராய்வது ஒரு முக்கிய பகுதியாக இருக்கும்.ஆனால் அது அவ்வளவு சுலபமல்ல.அப்படியே தட்டு தடுமாறி சிறிதேனும் அந்த நிகழ்வுகளை அணுகி ஆராய்ந்திருந்தாலும் அது முடிந்த பின் அடுத்த இரண்டு மணி நேரத்துக்கு சுண்டு விரலைக்கூட அசைக்க முடியாது!

 

     அதை உணர்த்தும் விதமாக தனது பழைய வீட்டின் படிகள் சிலவற்றை ஏறியதும் அதற்குமேல் போக முடியாமல் தடுமாறி அமரும் காட்சி இருக்கும்.விஜூ பிரசாத்தை பொறுத்தவரையில் அது செங்கல் சிமெண்ட் வைத்து கட்டப்பட்ட வெறும் வீடு மட்டுமல்ல.தனது தாய் தம்பி மரணித்த இடம்.தனது இடைவிடாத உளவியல் போராட்டங்கள் நடந்த இடம்,ஒருவகையில் தாய் தம்பி மற்றும் தனது இடைவிடாத சொந்த ஆழ்மன அலறல்கள் இவைகளின் மொத்த தொகுப்புதான் அந்த வீடு.அதனாலேயே அவனால் படியேறி வீட்டுக்குள் செல்ல முடிவதில்லை.என்றுமே அவனால் அந்த வீட்டிற்குள் போகவே முடியாது!

 

    இப்படத்தை முதலில் பார்த்தபோது அதிர வைத்தது படத்தின் title track!போதைப்பொருள் ஏற்படுத்தும் விளைவுகளை  விட்டுவிடுவோம். Prescription  உளவியல் மருந்துகள் உள்ளே ஏற்படுத்தும் விவரிக்கவே முடியாத பல உணர்வுகளை அப்படியே அந்த ட்ராக் வெளிப்படுத்தி இருந்தது!

    குறிப்பாக டைட்டில் ட்ராக் ஆரம்பத்தில் வரும் ஒரு  பெண்ணின் ஹம்மிங் அதிஅந்தரங்கமான ஒரு(மேற்சொன்ன) அனுபவத்தை அம்பலப்படுத்தியது போல கடும் அதிர்ச்சியை தந்தது .இந்த ட்ராக்கை உருவாக்கிய விநாயகனின் சட்டையைப்பிடித்து உலுக்கி "இது எப்படிய்யா உனக்குத்தெரியும்??" என்று கேட்கத்தூண்டியது!

 

 

   "விநாயகன் இவ்வளவு அசாத்திய இசைத்திறமையை ஏன் வெளிப்படுத்தாமல் அடக்கி வாசிக்கிறார்??ஒழுங்காக நடித்து ஒழுங்காக இசையமைத்து கொண்டிருக்காமல் ஏன் ஏகப்பட்ட சர்ச்சைகளில்(விக்கிபீடியாவில் இவரது படங்களின் பட்டியலைவிட சர்ச்சைகளின் பட்டியல் அதிகம்)சிக்குகிறார்?" என்றெல்லாம் நாம் கேட்க மாட்டோம்.அவர் அப்படி எந்த ஒரு புள்ளியிலும் நிலைகொள்ளாமல் இருப்பதாலேயே மேற்சொன்ன அந்த அதி அற்புத டைட்டில் ட்ராக்கை உருவாக்க முடிந்தது! 

 

பாடல் படமாக்கப்பட்ட விதமும் பாடலின் ஆன்மாவை பிரதிபலிக்கும்!    

     அதிலும் இந்த ட்ராக் மிக்ஸிங் + ஒலித்தரம் எல்லாம் அறிவுஜீவி பிரகாசு போன்றோர் பாடமாகப்படிக்க வேண்டிய அளவில் இருக்கிறது!

   

ஆ ஆ அபர்ணா!

 

ஆ!ஆ!அபர்ணா!

ஹேராம் படத்தில் அபர்ணா (ராணி முகர்ஜி) கொல்லப்பட்டு கிடக்கும் நேரத்தில் சாகேத் ராம் (காசர்)இந்த வசனத்தை சொல்வார்.பத்து வருடம் முன்பே யோசித்து படம் எடுக்க கூடியவர் என்று அவரை சொல்வார்கள்.இந்த விஷயத்தில் இருபது வருடங்கள் முன்பே யோசித்து விட்டார்!

 

   சூரரை போற்று என்ற ஒலக சினிமாவில் பொம்மி(அபர்ணா பாலமுரளி) கேரக்டர் தெனாவெட்டாக இருக்க வேண்டும் என்று இயக்குனர் விரும்பி இருக்கிறார்.அதற்காக வசனம் பேசுவதற்கு முன்பும் பின்பும் வாயில் ஈ புகுந்தால் கூட தெரியாமல் இருக்கும்படி ஆ என்று வாய்பிளந்தபடி முகத்தை வைத்துக்கொள்ள வேண்டும் என்று ரோசனை சொன்னது யாரென்று தெரியவில்லை!இயக்குனர் யோசனையா? அல்லது கோவை சரளா மாதிரி "நானே ஜிந்திச்சேன்" என்று அபர்ணாவே யோசித்து நடித்தாரா என்று தெரியவில்லை.

 

    ஆனால் அதிலிருந்து அம்மணி நடிக்கும் படம் என்றாலே நமக்கு பயம் தான்.ஆர்வமாக தங்கம் படத்தை பார்த்துக்கொண்டிருந்த போது அதில் இவரும் உள்ளார் என்று தெரிந்து குலை நடுங்கியது.பிறகு மலையாள சினிமாவில் ஓவராக்டிங் செய்தால் மண்டையில் தட்டுவார்கள் என்ற நம்பிக்கையில் படத்தை தொடர்ந்தோம்.
    இப்போது கூட தூமம் படத்தை இரு காரணங்களுக்காக பார்க்க விருப்பம். ஃபஹத் மற்றும்  கிங்ஸ் லெவனை மையமாக கொண்ட கதை என்பதால்!ஆனால் இப்படத்திலும் அம்மணி இருப்பதால் இப்போதுவரை பார்க்கவில்லை.கொஞ்சம் மனதை திடப்படுத்திக்கொண்டு பார்க்க வேண்டும்!

அடுத்து புறநானூறு படத்தில் எந்த நடிகை ஓவராக்டிங் செய்ய போகிறாரோ

! 

தெனாவெட்டா இருக்கணும்னா வாயை பிளந்துட்டு இருக்கணும்னு யார் சொன்னது

 

*************************************************
தெக்கு வடக்கு:

விநாயகன் நடித்த தமிழ்படத்தில் பிடித்த கேரக்டர் என்றால் மதுரை சம்பவத்தில் வரும் மண்டையன் தான்.திமிரு படத்தில் விஷால் ஷ்ரேயா ரெட்டி மாறி மாறி கத்திக்கொண்டு இருந்ததால் இவரின் நடிப்பை சரியாக ரசிக்க முடியவில்லை.ஆனால் மதுரை சம்பவத்தில் வரும் மண்டையன் சம்பவமான கேரக்டர் தான்.சுடுகாட்டு மண்ட! என்று அடிக்கடி சொல்லிக்கொண்டு திரியும் நாயகனின் நண்பன் வேடத்தில் அட்டகாசமாக நடித்திருப்பார்!

 

    இப்படம் பார்த்ததற்கு இரு காரணங்கள்
-விநாயகன் பிரதான வேடத்தில் நடித்தது& பட போஸ்டரில் வந்த Saturday night fever பட போசில் சுராஜ் (சூரஜ் அல்ல என்றொரு பதிவு பார்த்தோம்) மற்றும் விநாயகன் :D

      படத்தின் முதல் பாதியில் விநாயகன் பிரதானமாக வந்தால் இரண்டாம் பாதியில் சங்குன்னி (சுராஜ்) செய்யும் சேட்டைகள் "ரொம்ப ஓவரா போறமோ?சரி போய் பார்ப்போம்" என்ற வடிவேலு வசனம் மாதிரி கையில் டார்ச்சை எடுத்துக்கொண்டு மாதவன் (விநாயகன்) கேரக்டர் இறந்து கிடக்கும் வீட்டில் அவர் செய்யும் கூத்துக்கள் ரணகளம்!Iஇனி யார் டார்ச்சை கையில் எடுத்தாலும் இதான் நியாபகத்துக்கு வரும்! :D

   அது சிலருக்கு பிடிக்கும்.சிலருக்கு "இதையெல்லாமா காமெடியாக்குவார்கள்" என்று தோன்றலாம்!நாம் முதல் வகை (அதான் ஊருக்கே தெரியுமே! - கும்மாங்கோ) என்பதால் ரசித்தோம். :D

   அவல நகைச்சுவை விஷயங்கள் படத்தில் ஏராளம்.மேற்சொன்ன அந்த காட்சிகள் தவிர்த்து ஒரு நிலத்துக்காக இரு குடும்பத்தலைவர்கள் முப்பது ஆண்டுகளாக வழக்கில் முட்டிக்கொண்டு நிற்பது,தீர்ப்பு வரும் வேளையில் வழக்காடிய வக்கீலுக்கே வழக்கின் விவரங்கள் முழுமையாக மறந்துபோனது,மாதவன் அறுபது வயதில் மனைவி கொடுத்த வரதட்சணையில் ஐந்து பவுன் பாக்கி என்று அவரை பிறந்த வீட்டுக்கு அனுப்புவது,ஒருவழியாக தீர்ப்பு வந்து அதை மாதவன் கொண்டாடியது,கொண்டாடிக்கொண்டிருக்கும் வேளையில் நடக்கும் அந்த அவலம்,தீர்ப்பு வந்த அன்றே மேல்முறையீடு செய்து ஸ்டே வாங்கியது,இறந்த பிறகு அந்த நிலத்தில் விடிய விடிய படுத்திருக்கும்  சங்குன்னி  நோய்வாய்ப்பட்டு மரணித்தல்,பிறகு அடுத்த தலைமுறை வாரிசுகள் முதலில் ஒற்றுமையாக இருப்பது பிறகு அவர்களும் அதே சர்ச்சைக்குரிய இடத்தில் அடிதடியில் இறங்குவது என்று தொடர் அவலங்கள்!
சிலருக்கு பிடிக்கலாம்.சி(ப?)லருக்கு இது பிடிக்காது.எப்படி இருந்தாலும் விநாயகன் மற்றும் சுராஜின் அட்டகாச நடிப்புக்காக பார்க்கலாம்!
-
***************************************************
Apaharan(2005):

பீகார் எப்படிப்பட்ட மாநிலம் என்று சொல்லி தெரிய வேண்டியதில்லை.இரு மாநிலங்களுக்கு இடையே செல்லும் ரயில் பீகார் வழியாக செல்கிறது என்றாலே பயணிகள் நடுங்கி பார்த்ததுண்டு.இப்போது கொஞ்சம் நிலைமை மாறியிருப்பதாக சொல்கிறார்கள்.தெரியவில்லை.

 

    ஆனால் ஒரு காலத்தில் ஒரு அரசியல் தலைவரின் மகள் திருமணத்திற்காக கார் ஷோரூமில் இருந்த புது கார்களை தம்படி காசு கொடுக்காமல் அள்ளிட்டு வந்த கதையெல்லாம் உண்டு.ஆள் கடத்தல் சம்பவங்ககளுக்கும் பஞ்சமில்லை.

   அப்படியான ஆள் கடத்தும் கும்பல் அதிகார மையத்தோடு கூட்டணி அமைத்து செயல்பட்ட அவலத்தை இப்படம் காட்டுகிறது.படத்தின் முடிவு கொஞ்சம் நாடகத்தனமாக இருந்தாலும் அதிகார போட்டியில் சாமானியர்கள் வரை பகடைக்காயாக ஆக்கப்படுவதை படம் இயல்பாக சித்தரித்துள்ளது.

 

    இப்படம் பார்க்க முக்கிய காரணம் நானா படேகர்.ஆள் கடத்தல் செய்யும் ஒரு சட்டமன்ற உறுப்பினர் வேடத்தில் அட்டகாசமாக நடித்துள்ளார். சின்ன சின்ன முகபாவ மாற்றங்களை எதிர்பாராத நேரங்களில் கொடுத்து அசரடிக்கிறார்!ஜெயிலில் இருக்கும் அஜய் சாஸ்திரி(அஜய் தேவ்கன்) யைப்பார்க்க வரும்போது அவர் ஸ்கிப்பிங் செய்து கொண்டிருக்க யாருமே எதிர்பாராத விதமாக சர்ரென்று அவரோடு சேர்ந்து ஸ்கிப்பிங் செய்யும் காட்சி அதகளம்!

 

    முகேஷ் திவாரி- போக்கிரி கந்தசாமி படங்களில் வில்லனாக வந்தவர் இதில் நல்லவர்.இவரை பார்க்கும்போது ஷைன் டாம் சாக்கோ தான் நினைவுக்கு வருகிறார்.அல்லது vice versa!தோற்றத்தில்!இவ்வளவு நல்ல நடிகருக்கு சரியான கேரக்டர்கள் கொடுக்காமல்/ஒரேமாதிரியான வில்லன் கேரக்டர் கொடுத்தே வீணடிக்கிறார்களே என்ற வருத்தம் ஏற்பட்டது!

     

வடக்குபட்டி பஸ் ஸ்டாப்

 ஹே மின்னலே - மிக்ஸிங் சொதப்பல்!

    ஒரு பாடலில் டியூன் இசை பாடகர்கள் பாடிய விதம் எல்லாமே நன்றாக இருந்தாலும் மிக்சிங் மட்டமாக இருந்தால் அந்தப்பாடலை ரசிக்க முடியாமல் போகும்.

 

         இப்பாடலில்(லும்) அதுதான் நிகழ்ந்துள்ளது.ஸ்வேதா மோகன் குரல் தேவாவின் இசையில் பல பாடல்களைப்பாடிய மாதங்கியின் குரல் மாதிரி ஒலிக்கிறது.பாடல் நெடுக வரும் பீட்ஸ் பள்ளி/கல்லூரி கிளாஸ் மேஜையில் நான்கைந்து பேர் ஒருசேர கையால் தட்டியபடி பாடுவார்களே!அந்தமாதிரி ஒலித்தது!என்னய்யா இதெல்லாம்???
அறிவுஜீவி பிரகாசு இதுவரை இசையமைத்த பாடல்களில் உருப்படியாக மிக்ஸ் செய்யப்பட்ட பாடலை நாம் கேட்டதில்லை.
    வீரத்தமிழன் மறத்தமிழன் என்றெல்லாம் தனக்குத்தானே பட்ட பெயர் சூட்டிக்கொண்டு பேஸ்புக் & எக்ஸ் தளத்தில் பிரகாசு குழாயடி சண்டை போடுவதை நாமே பார்த்துள்ளோம்!அப்படி நேரத்தை விரயம் செய்தால் பாடல்களின் ஒலித்தரம் இப்படித்தான் இருக்கும்!

    இதற்குத்தீர்வாக தனது ஸ்டுடியோவில் ஏ.ஆர்.ரஹ்மான் & ஹாரிஸ் ஜெயராஜ் படங்களை கண்ணில் படும் வண்ணம் பெரிதாக மாட்டி வைக்கலாம்.அதை பார்த்தாவது அவர்கள் பாடல்களின் ஒலித்தரத்தில் 10% ஆவது அடைய  உத்வேகமாக இருக்கும்!

 

    அதிலும் தனது தாய்மாமன் மாதிரி  சில்லல்லவா ,Ishq Bina என்று variable sound quality mixing எல்லாம் இந்த ஜென்மத்தில் பிரகாசால் நினைத்து பார்க்க முடியாது.எவனோ ஒருவன் வாசிக்கிறான்  பாட்டின் ஒலித்தரத்தில் 10% பண்ணாலே பிரகாசுக்கு அது  உலக சாதனைதான்!
  **************************************************  
ஒரு சினிமாக்காரன்:

இது வினீத் ஶ்ரீனிவாசனுக்கு பொருத்தமான கதைதான்.சினிமாவில் ஒரு இயக்குநராக முயற்சிக்கும் ஒரு கதாபாத்திரம்.படத்தில் இரண்டாம் பாதியில்  நம்பமுடியாத திருப்பங்கள் ஜெர்க் அடித்து விடுகிறது என்றாலும் (நம்மைப்போன்ற) வினீத் ரசிகர்களுக்கு பார்க்கக்கூடிய ஒரு படம்தான்.நகைச்சுவை படமா?சீரியஸ் படமா? என்ற குழப்பத்தில் தத்தளிக்கிறது படம்!

 

      இதில் குறிப்பிட வேண்டியது கதாபாத்திரம் அந்த காவல் அதிகாரி(பிரசாந்த் நாராயணன்) தான்.மனிதர் கடலை மன்னனாக ஒரு பெண்ணை விடாமல் ஜொள்ளித்தள்ளும் காட்சிகள் ரணகளம்!  அதிலும் இவர் ஜீப்பில் வரும் காட்சிகளில் இவரை காட்டாமல் இவரின் உதவிக்கு வரும் பெண் காவல் அதிகாரி பைக்கில் வருவதை ஃபோகசில் காட்டியது குறு(சு)ம்பு!  

  

          கொலை செய்யப்பட்ட ஒருவர் குறித்து விசாரிக்க வந்த இடத்திலும் "ரணகளத்திலும் ஒரு கிளுகிளுப்பு" என்பதாக அவர் கடலை போடும் காட்சி இருக்கே!அந்த பெண்ணிடம் எந்த ஊர் என்று கேட்டதும் மும்பை என்று அவர் பதிலளிக்க "ஆம்ச்சி மும்பை" என்று ஒருமாதிரி இழுத்து சொல்லும் காட்சி அல்டிமேட்! :D . (பழைய)எஸ்.ஜே.சூர்யா தோற்றார்! ;)

   லால் மற்றும் ரெஞ்சி பணிக்கர் இடையே வரும் ஆரம்ப (காமெடியான) சண்டை காட்சியையும் ரெஞ்சி பணிக்கர் மற்றும் அவரது சகாக்கள் இடையே நடக்கும் உரையாடல்களையும் தமிழில் நினைத்துக்கூட பார்க்க முடியாது!கொந்தளிப்பு ஏற்பட்டுவிடும்!

     இதிலும் வினீத் பாடிய ஒரு பாடல் அட்டகாசம்.அவரின் இசை ரசனை குறித்து தனிப்பதிவு வரும்.
***************************************************
Johnny Gaddar:

 ஶ்ரீராம் ராகவன் படங்கள் ஒருவகையில் தேவாவின் இசை போல. தேவா எப்படி எங்கெங்கோ இருக்கும் பாடல்களில் உள்ள ட்யூன்/பீட்ஸ் ஆகியவற்றை எடுத்து நம் ரசனையோடு கலந்து ரசிக்கும்படி பாடல்களை கொடுப்பாரோ அப்படி ஶ்ரீராம் ராகவன் கூட ஏதேதோ மொழி நாவல்களை படங்களை ஹிந்தி மணம் (கொஞ்சம் தமிழ் மணமும்!) கலந்து கொடுப்பதில் வல்லவர்.

 

     பத்லாபூர் படத்தில் மிஷா  (யாமி கௌதம்) வீட்டில் தொங்கும் குமார விகடன் கேலண்டர் இப்போதும் கண்முன் நிற்கிறது.இப்படத்தில் ஒரு நர்ஸ்  வைஜெயந்தி தமிழ் பேசுகிறார்!

     நீல் நிதின் முகேஷ்க்கு முதல் படமே ஜாக்பாட்தான்!தமிழில் இதை பிரசாந்த் செய்தார்.ஏன் செய்தார் என்று தெரியவில்லை!பழைய ஹிந்தி படங்கள் பாடல்களை பயன்படுத்திய விதம் புதுமை.

 

         அமிதாப் நடித்த Parwana படக்காட்சிகள் காட்டப்படுகிறது.அப்படம் குறித்த வசனங்களும் வருகிறது!ஆனால் இன்று நீங்கள் Parwana படத்தை பார்க்க முடியாது. பிரின்ட்டை காணோம்!இப்படம் வெளியிட்ட நேரத்தில் ஒரு உபகாரமாக கூடவே Parwana படத்தையும் remaster செய்து வெளியிட்டிருக்கலாம்!படத்தில் காட்டப்படும் Parwana காட்சிகள் அவ்வளவு துல்லியமாக இருந்தது!
     
       


       

சில தமிழ்ப்படங்கள்

 தமிழ்ப்பட பித்தன் : டேய் பெரிய ஸ்காடா நீ?தமிழ்ல எவ்வளவோ உலக சினிமா வந்திருக்கு.அதைப்பத்தியெல்லாம் எழுத மாட்டியோ?வானத்துலேர்ந்து குதிச்சவனோ?
.
உதயா : ண்ணா. ...உலக சினிமா உளுந்தூர்பேட்டை சினிமா இதெல்லாம் நமக்கு கணக்கில்லை!நமக்கு பார்க்கணும்னு தோணனும்!பாத்தாலும் நாலு பத்தி தானா வரணும். அவ்வளவுதானுங்!
.

GOAT:
படத்துவக்கத்தில் இந்தமாதிரி இந்தமாதிரி கேரக்டர்கள் பல வருடங்களாக ஒற்றுமையாக வாழ்கிறார்கள் என்று நம்பவைக்க இயக்குனர் ரொம்ப மெனக்கெட்டு உள்ளதுபோல தெரிந்தது.
      உருப்படியான மசாலா படம் தமிழில் வந்து வருடங்கள் ஆகிறது என்ற குற்றசாட்டை கொஞ்சம் பொய்ப்பித்து உள்ளதை மறுக்க முடியாது.

      அதிலும் விஜயை வைத்துக்கொண்டு ஜி.எஸ்.டி பிரச்சனை,நீட் பிரச்சனை, Vestibular shwannoma பிரச்சனை என்றெல்லாம் நீட்டி முழக்காமல் அடக்கி வாசிக்க வைத்தது(அல்லது அவரே அடக்கி வாசித்து விட்டது) பெரிய அதிசயம் தான்!

 

       பெரிய உறுத்தலாக இருந்த விஷயங்கள் என்றால்:
- விஜயின் தோற்றம்.கத்தி படத்துக்கு பிறகு அவரின் தோற்றம் இயல்பாக இருந்து பார்த்ததாக நினைவில்லை! புலியில் தந்தை கேரக்டரின் தமாசு கெட்டப் தொடங்கி லியோ வரையில் ஹேர்ஸ்டைல் சரியில்லை தாடி சரியில்லை என்பதாக எதோ ஒரு குறை.
வயதான விஜயின் ஒட்டு தாடியை பிடித்து இழுக்க வேண்டும் என்ற பரபரப்பு இருந்தது!
தற்கால கெட்டப்பில் பிரசாந்த் மற்றும் பிரபுதேவா இயல்பாக பொருந்தி இருந்தனர்!ஆனால் அண்ணா???

ஜீவன் கேரக்டரின் கெட்டப் ருத்ரா பட கௌதமியை முன்மாதிரியாக வைத்து உருவாக்கியிருக்ிறார் போல!இடையில் பதின்ம வயது அண்ணா deep fake மூலம் நன்றாக உருவாக்கப்பட்டிருந்தார்!

 

- மற்றொன்று வயதான விஜயின் கண்ணாடி! சொதப்பியது ஸ்டைலிஸ்ட் ஆ? இயக்குநரா??
- அன்பறிவ் உருவாக்கிய சண்டைக்காட்சிகள் சில இடங்களில் நன்றாக இருந்தாலும் பெரும்பாலும் கிரீன் மேட் ரோப் ஷாட் என்பதாகத்தான் இருந்தது.குறிப்பாக கிளைமேக்ஸ் காட்சி அண்ணாவின் வீட்டு மாடியில் கிரீன் மேட் போட்டு எடுத்து அதை எம்.ஏ.சிதம்பரம் மைதானம் என்பதாக மாற்றியது போலவே இருந்தது!சரி...பெரிய ஹீரோ பெரிய பட்ஜெட் என்றால் கொஞ்சம் பெரிய லெவல் சண்டை காட்சி இருக்கும்தான்.அதை ஒரு அளவில் நிறுத்தி கொள்ளுதல் நலம்.சும்மா ஹீரோ தரையில் நிற்பதை கூட கிரீன் மேட் போடவேண்டிய அவசியமில்லை!
- யுவனின் இசை: ஏற்கெனவே சென்ற பதிவில் குறிப்பிட்டது போல "பழைய beats மிஸ்ஸிங்"!

- பார்த்தேன் ரசித்தேன் ஜோடியை மீண்டும் கொண்டுவந்தவர்கள் அந்த படம் போலவே இருவரும் ஒரு வார்த்தை பேசிக்கொள்ளாமலே கருத்துக்களை பரிமாறி கொள்வதாக காட்டி இருந்திருக்கலாம்! An ode to Saran!

- அன்புள்ள காதலுக்கு சுட்ட பழம் படங்களில் அப்பட்டமாக விக் என்று தெரியும் வண்ணம் அணிந்த மோகன் இப்படத்தில் விக் என்றே சொல்லமுடியாதபடி தோற்றமளித்தார்!

-  கண்டிப்பாக  தேர்தலுக்குப்பின் மீண்டும் அண்ணா நடிக்க வருவார்!
GOAT Vs OG எடுக்க வெங்கட் பிரபு தயாராகவே இருப்பார்.ஆனால் அதில் நடிக்க அண்ணா ஒப்புக்கொள்வாரா? என்பது கேள்வி.காரணம் இந்தியன் 2 வில் காசருக்கு விழுந்த தர்மடி இனி ஹீரோக்களை இரண்டாம் பாகம் நடிப்பதற்கு முன் ஆயிரம் முறை யோசிக்க வைக்கும்!
****************************************************

ஒரு நொடி : Red herring என்பார்கள்.கொலையை இவர் செய்தாரா அவர் செய்தாரா? என்று பார்வையாளனை சுற்றலில் விட்டு பிறகு உண்மையான கொலையாளியை & கொலைக்கான காரணத்தை அம்பலபடுத்துதல்!இதில் ஏகப்பட்ட red herringகுகள்! படத்தின் இயக்குனர் வெற்றிமாறனின் ரசிகர் போல. எவன் மேல் சந்தேகம் இருந்தாலும் உள்ளே தள்ளி 'நெஞ்சுல மிதிலே விலாவுல குத்துலே ' தான்!கொஞ்சம் ஓவராக போய்விட்டதாக தோன்றியது .

 

   மற்றபடி அந்த திருப்புமுனை தருணம் அம்பலமான போது நமக்கு நினைவுக்கு வந்தது Taking of Pelham 1974 படத்தின் கிளைமாக்சில் அந்த கேரக்டர் தும்மும் தருணம்!Achchooooooooo!

 

***************************************************

Black: Shrodinger அது இதுவென்று பூனை விட்டதற்கு ஃப்ரிட்ஜில் இருந்த கீட்டமினை கணவனும் மனைவியும் ஆளுக்கொரு மில்லி ஏத்திகினு ஒரு வாரம் தூங்கி இருந்திருக்கலாம்!எந்த பிரச்சனையும் இருந்திருக்காது! 

 

ஓநாயும் ஆட்டுக்குட்டியும் படத்தில் காவல் அதிகாரி லால்  (ஷாஜி)மருத்துவமனைக்கு வெளியே  கீட்டமின் பயன்படுத்திய மருத்துவ மாணவர் சந்த்ரு (ஶ்ரீ)கதாபாத்திரத்துக்கு எதிராக கடுமையாக மேலதிகாரியிடம் வாக்குவாதம் செய்யும் காட்சி ஜீவா கண்முன் ஒடியிருக்க வேண்டும்!அதற்கு பயந்தே பயன்படுத்தவில்லை போல!படத்தை தொடர்ந்து பார்த்தால் புரியாதது போல இருக்கும்.ஆரம்பத்தை மட்டும் பார்த்து கிளைமேக்ஸ் பார்த்தால் புரியும்!நடுவுல கொஞ்சம் திரைக்கதையை காணோம்!

***************************************************

வசந்த முல்லை : மேற்சொன்ன படத்தில் ஏன் இப்படியெல்லாம் நடக்கிறது என்பதற்கு அவர்கள் சொன்ன காரணத்தை விட இந்தப்படத்தில் (கிட்டத்தட்ட அதே மாதிரி நிகழ்வுகள்) ஏன் இப்படி நடக்கிறது என்பதற்கான காரணம் லாஜிக்காக  நம்பும்படி இருந்தது.படத்தில் ஒரு மெசேஜ் சொல்லிவிட வேண்டும் என்ற பரபரப்பு தெரிகிறது.

 

அதை தள்ளிவைத்து கொஞ்சம் பட்டி டின்கரிங் பார்த்தால் இதையே ஒரு அவல நகைச்சுவை படமாக மாற்றி விடலாம்(அவனவன் சொந்த வாழ்க்கையை விடவா சிறந்த அவல நகைச்சுவை இருக்க போகிறது? - கும்மாங்கோ)!"மவனே இன்னைக்கு உன்ன கஞ்சி காய்ச்ச போறாங்க!அதான் உன் விதி" என்ற தலைவரின் வசனம் இப்பட கதாபாத்திரத்துக்கு அட்டகாசமாக பொருந்தும்!

***************************************************
வேட்டையன் படத்தில் எதுவுமே சரியில்லை என்பதாக பலரும் பேசியும் எழுதியும் உள்ளதை கண்டு கோபம் வந்தது!கண்டிப்பாக சில உருப்படியான விஷயங்கள் இருந்தன.
- ரஜினியின் magnetic clip-on கண்ணாடி ஃப்ரேம்!ஜெயிலர் படத்தில் அவரது கண்ணாடி ஃப்ரேம் மிகச்சரியாக பொருந்தி இருந்தது போல இதிலும்!இந்த அதிர்ஷ்டம்/சரியான தேர்வு அண்ணாவுக்கு கோட்டில் அமையவில்லை!நம்மவர் படத்தில் காசர் flip type கண்ணாடி அணிந்தது அப்போது பேச்சு பொருளாக இருந்தது.அதில் அவர் முகவெட்டுக்கு ஏற்றாற்போல் oval வடிவ ஃப்ரேம் அணிந்திருப்பார்.துணிவு படத்தில் அஜீத் ஏழாங்கிளாஸ் மாணவன் அணியும் ஃப்ரேம் அணிந்துகொண்டு வந்தார்!

- ரஜினி கேரக்டர் பயன்படுத்திய Samsung Galaxy Flip 5 . அதிலும் குறிப்பாக cream வண்ண மாடல் அட்டகாசம்!

ஆமா இந்த படத்துக்கு ஃபஹத் பாசில் எதுக்கு??

 

    எந்நேரமும் புரச்சி மோடில் இருக்கும்/இருப்பதாக காட்டிக்கொள்ளும் இயக்குனருக்கு இந்தளவு aesthetic sense இருக்க வாய்ப்பில்லை! ஸ்டைலிஸ்ட்/Art/Costume/உதவி இயக்குனர்கள் என்று யாரோ இருவர் சொன்ன யோசனையாகத்தான் இது இருக்கும்.அந்த ரசனைக்கார(ரி) நபர்களுக்கு பாராட்டுக்கள்!Good taste!
- செக்க சிவந்த வானம் படத்தில் அரவிந்த் சாமி vaping செய்வார்!அதன்பின் இப்படத்தில் அபிராமி கேரக்டர் செய்வதாக காட்டியுள்ளார்கள்.அது சாதாரண vaping ஆ? essential oil vaping ஆ? என்று காட்டியிருக்கலாம்! வில்லி கேரக்டர் என்றாலே புகைக்க வேண்டும் என்ற அவசர முடிவு மட்டுமே தெரிகிறது. ஈரோ அவசர முன்முடிவு எடுத்ததை கண்டிக்கும் இயக்குனர் புகைப்பவர்கள் எல்லாரும் கெட்டவர்கள் /கெட்டவர்கள் எல்லாரும் புகைப்பார்கள்,குறிப்பாக வில்லித்தனமான பெண்கள் என்ற க்ளீஷேவுக்குள் சிக்கியது ஏனோ??? (கிங்ஸ் லெவன் புகைப்போர் பாதுகாப்பு இயக்கமொன்று தேவை உதயா  - கும்மாங்கோ)